Վարվեցողության կանոններ, որոնք ձեր կյանքը ավելի կհեշտացնեն

Ինչպես ասում էր Կոկո Շանելը. «Դու չես ունենա առաջին տպավորություն թողնելու երկրորդ հնարավորություն»: Հնարավոր է լեգենդար դիզայները այս խոսքերը ասել է հագուստի մասին, բայց մարդկանց հետ շփվելու համար միայն հագուստը բավական չէ: Առանց վարվեցողության կանոնները իմանալու գեղեցիկ հագուստի թողած առաջին տպավորությունը կհավասարվի զրոյի:  Առհասարակ, եթե փորձենք համակարգել էթիկայի կանոնները, ապա դրանք կարելի է բաժանել մի քանի խմբի՝ խոսքի կուլտուրա, վարվեցողության տարրական կանոններ, պատշաճ արտաքին տեսք և էմոցիաները կառավարելու կարողություն:

ShantNews-ը ներկայացնում է վարվեցողության մի քանի կանոն, որոնք իրականում շատ հասարակ են, բայց ձեր առօրյան ավելի հեշտ կդարձնեն:

Եթե դուք դիմացինին ասում եք «Ես ձեզ հրավիրում եմ ճաշելու», ապա նշանակում է, որ դուք եք հաշիվը փակելու: Իսկ եթե ասում եք «գնանք մի տեղ ճաշելու», ապա այս ձևակերպան դեպքում ամեն մեկը իր բաժինն է վճարում:

Առանց նախապես զանգահարելու հյուր մի՛ գնացեք: Եթե ձեզ հյուրընկալվել են առանց նախապես զգուշացնելու, ապա դուք շատ հանգիստ կարող եք ձեր հյուրերին դիմավորել խալաթով: Մի բրիտանուհի այս առիթով ասել էր. «Երբ տեսնում եմ, որ չնախատեսված հյուրեր են գալիս իմ տուն, ես հագնում եմ բարձրակրունկներ, դնում եմ իմ լայնեզր գլխարկը և վերցնում եմ անձրևանոցը: Հենց շքամուտքի մոտ տեսնում եմ անկոչ հյուրերին միանգամից տանից դուր եմ գալիս՝ ասելով «օ՜, ինչ ափսոս, ես էլ գործերով պատրաստվում եմ դուրս գալ տանից»:

Առհասարակ հարգալից չէ կնոջը SMS հաղորդագրությամբ ռոմանտիկ հանդիպման հրավիրել: Իսկական ջենտլմենները զանգով են իրենց հարցերը լուծում:

Երբ ընկերներով ինչ-որ մի ժամանցային վայրում եք, ապա առանց անհրաժեշտության մի՛ զբաղվեք ձեր հեռախոսով: Մեզանից շատերը հաճախ են ընկերական հավաքույթների ժամանակ ռեֆլեքսորեն անընդհատ ստուգում Ֆեյսբուքը, Ինստագրամը, Թվիթերը և մյուս սոցկայքերը: Բայց մինչ դուք խորազուզված եք վիրտուալ աշխարհի մեջ և պատասխանում եք ձեր վիրտուալ ընկերների մեկնաբանություններին, այդ նույն ժամանակ դուք կորցնում եք իրական ընկերներին, ովքեր ձեր կողքին են:

Տղամարդիկ երբեք չպետք է վերցնեն կանացի պայուսակը կնոջը օգնելու նպատակով: Դա կողքից շատ տգեղ է դիտվում:

Ձեր կոշիկները միշտ մաքուր պահեք:

Եթե ձեզ վիրավորել են, ապա դա չի նշանակում, որ դուք էլ պետք է ձեր ձայնը բարձրացնեք և համարժեք պատասխանեք դիմացինին: Մի՛ իջեք դիմացինի մակարդակին, ավելի լավ է ուղղակի ժպտաք և հեռանաք այդ անհավասարակշված մարդու կողքից:

Մի քանի բան, որ բոլորովին պետք չէ առաջին հանդիպման ժամանակ պատմել դիմացինին՝ տարիքը, հարստությունը, ձեր սեյֆի տեղը, սիրային հարաբերությունները, բժշկի կողմից տված դեղատոմսը և ձեզ ուղղված անարգանքը:

Տղամարդը կնոջից առաջ պետք է մտնի ռեստորան: Նման կերպ դուք ցույց կտաք, որ դուք եք կնոջը հրավիրել և դուք էլ վճարելու եք հաշիվը:

Երբեք մի՛ հպվեք կնոջը առանց նրա թույլտվության: Անգամ եթե չեք կարողանում կառավարել ձեր էմոցիաները, այնուամենայնիվ պետք է իրավիճակից կռահեք, թե երբ է պետք բռնել կնոջ ձեռքը կամ գրկել մեջքից:

Կնոջ ներկայությամբ տղամարդը պետք է ծխի միայն կնոջ թույլտվությունը ստանալուց հետո:

Անկախ ձեր պաշտոնից և դիրքից, եթե դուք մտնում եք որևէ մի հաստատություն, օֆիս, բանկ կամ մեկ այլ տեղ, ապա առաջինը դուք պետք է բարևեք:

Եթե ներողությունից հետո ձեզ հասկացել և ներել են, ապա էլ պետք չէ նորից վերադառնալ նույն ցավոտ թեմային:

Մի մոռացեք ձեր հարազատներին երախտապարտ լինել այն բանի համար, որ անկախ ամեն ինչից, անկախ ձեր պահվածքից նրանք ձեզ սիրում և միշտ ներում են: 

Լիլիթ Խաչատրյան