Եթե «Չումբո»-ի հետ համագործակցություն չի եղել՝ կազմակերպությունն ինչպե՞ս է մտել հանրակրթական դպրոցներ

ԿԳՆ հանրակրթության վարչության պետ Աշոտ Արշակյանն ու Երևանի քաղաքապետարանի աշխատակազﬕ հանրակրթության վարչության պետ Աննա Ստեփանյանն այսօր պատասխանել են լրագրողների այն հարցին, թե ինչպես է հաջողվել «Չումբո» նախաձեռնող խմբին մտնել մոտ 90 հանրակրթական դպրոցներ  ու աշակերտների համար տարատեսակ միջողառումներ կազմակերպել, այդ թվում նաև դիսկոտեկներ, որտեղ դպրոցահասակ երեխաների համար արգելված չիպսեր ու գազավորված ըմպելիքներ են վաճառվել:

«Համագործակցության որևէ ծրագիր «Չումբոն» ու ԿԳՆ-ն չեն ունեցել: Մեզ ընկերությունը ծրագիր նույնիսկ չի էլ ներկայացրել»,– լրագրողներին ասել է ԿԳՆ հանրակրթության վարչության պետ Աշոտ Արշակյանը:

Երևանի քաղաքապետարանի աշխատակազﬕ հանրակրթության վարչության պետ Աննա Ստեփանյանի խոսքերով՝ իրենց ծրագիր ներկայացվել է, բայց քաղաքապետարանը հավանություն չի տվել դրան, ուստի չի էլ համագործակցել: Լրագրողների հարցին՝ այդ դեպքում ինչպե՞ս է կազմակերպությունը մի քանի տասնյակ դպրոցներ մտել, բանախոսները հստակ  պատասխան չեն տվել:

ԶԼՄ ներկայացուցիչների հաջորդ հարցն է եղել՝ ինչո՞ւ գործ հարուցված չէ, ո՞վ  է մեղավոր ի վերջո, գոնե նկատողություն ստացած անձինք կա՞ն:

«Անկեղծ ասած, այդ հարցի պատասխանը չգիտեմ»,- ասել է ԿԳՆ հանրակրթության վարչության պետ Աշոտ Արշակյանը: Իսկ Երևանի քաղաքապետարանի կրթության վարչության պետն ուղղակի լռել է:

Հիշեցնենք, որ դեռևս փետրվար ամսին «Չումբո» նախաձեռնող խումբն իր ֆեյբուքյան էջում հաղորդագրություն տարածեց, որ «Չումբո» նախաձեռնող խմբի նախագահ Սմբատ Հակոբյանը հանդիպել էր ԿԳ նախարար Լևոն Մկրտչյանի և փոխնախարար Մանուկ Մկրտչյանի հետ, ու որոշվել է կրթական հաստատություների միջոցառումների կազմակերպումը վստահել «Չումբո»-ին:

«Երկու ժամ տևած ջերմ զրույցի ավարտին որոշվել էր ՀՀ բոլոր հիմնական և ավագ դպրոցների, բուհերի և այլ կրթական հաստատություների միջոցառումների կազմակերպումը, կրթամշակութային միջոցառումների զարգացումը, վերջին զանգի տոնախմբությունների մեր տարբերակով փոփոխված և ավելի միասնական ու հետաքրքիր կազմակերպումները վստահել «Չումբո» նախաձեռնող խմբին՝ Սմբատ Հակոբյանի գլխավորությամբ»,- ասված է հայտարարության մեջ, ուր նշվում էր նաև, որ կրթության և գիտության նախարար Լևոն Մկրտչյանը շատ բարձր է գնահատել Սմբատ Հակոբյանի իրականացրած բոլոր նախաձեռնություններն ու ապագա կազմակերպվելիք խոշոր ծրագրերը:

Այս հայտարարությունը համացանցային մեծ աղմուկի ու քննարկումների պատճառ դարձավ, միջոցառումներին մասնակցած դպրոցականների ծնողներն ասում էին, որ երեխաներին տարել են առանց օդափոխության դահլիճներ ու այն, ինչ կազմակերպվել է աշակերտների համար, նրանց տարիքին համապատասխան չէ: Աղմուկից հետո ԿԳՆ նախարարությունը հաղորդագրություն տարածեց՝ հերքելով «Չումբո» նախաձեռնող խմբի տարածած հայտարարությունը՝ այն որակելով ապատեղեկատվություն:

«ՀՀ ԿԳ նախարարությունը տեղեկացնում է, որ նախարար Լևոն Մկրտչյանի և նախարարի տեղակալ Մանուկ Մկրտչյանի մասնակցությամբ «Չումբո» նախաձեռնող խմբի ներկայացուցիչների հետ հանդիպման վերաբերյալ տարածված հաղորդագրությունը ապատեղեկատվություն է: Հանդիպումը տեղի է ունեցել տվյալ նախաձեռնության խնդրանքով, որի ժամանակ ՀՀ ԿԳ նախարարի կողմից շատ հստակ պահանջ է դրվել՝ նախարարություն ներկայացնել գրավոր ծրագիր: Մինչ օրս ՀՀ ԿԳՆ-ն որևէ ծրագիր չի ստացել, հետևաբար, պայմանավորվածության մասին խոսք լինել չի կարող, ուստի ուսումնական հաստատություններին չի խրախուսվում համագործակցել մի կազմակերպության հետ, որը չունի ԿԳ նախարարության կողմից համաձայնեցված և հաստատված ծրագիր: «Չումբո» նախաձեռնող խումբը խախտել է էթիկայի նորմերը՝ հրապարակելով աշխատանքային հանդիպման մասին իրականությանը չհամապատասխանող հաղորդագրություն և մոնտաժված տեսագրություն, որը չի բխում ընդհանուր հանդիպման տրամաբանությունից, և հանրային շրջանակներում թյուրընկալումների տեղիք է տվել»,- ասված է հաղորդագրության մեջ:

ԿԳՆ-ն նաև պահանջել է  նախաձեռնող խմբից համացանցից հեռացնել իրականությունն աղավաղող տեսանյութը և հաղորդագրությունը հանրության շրջանում ապատեղեկատվության տարածումից խուսափելու համար: «Չումբո» նախաձեռնող խումբը դա  չի արել: